ANNA TARATIEL (mural)

Sin título
Mural de ANNA TARATIEL
📍Situación: Rúa Viriato Lamas, Ordes.

A artista catalana Anna Taratiel agasallounos con esta nova peza situada no barrio ordense do Piñeiro. Unha obra colorista, inspirada nas gamas cromáticas da natureza do propio entorno e nas formas da arquitectura tradicional e moderna que a sustentan e a rodean.

Tonalidades verdes, terras, cremas e tellas combínanse para dar forma a unha dinámica estrutura que nos leva dende o interior ata o exterior e nos adentra nun xogo compositivo entre patrón e variación. As imaxes recollidas dos diferentes ritmos e motivos dos tellados, os balcóns, as chimeneas, as paredes ou as fiestras deste antigo barrio, combináronse para dar forma a esta abstracta e xeométrica composición.

Por medio de planos de cor, liñas rectas, tintas uniformes e sutís degradados de cor, Anna móvenos con delicadeza nun mapa sen fronteiras entre o bidimensional e o tridimensional, que se sitúa a si mesmo balanceándose na propia parede como unha escultura da propia estructura do edificio.

+ info:
https://www.taratiel.com/